HII NI KAULI YA MWANAFUNZI ALIYESHIKA NAFASI YA 1 KITAIFA KATIKA MATOKEO YA KIDATO CHA 4.....ALIYESHIKA NAFASI YA 3 APATA MSHITUKO, AZIMIA

Mwanafunzi aliyeshika nafasi ya tatu kwa ufaulu kitaifa katika Matokeo ya Mtihani wa Taifa wa Kidato cha Nne wa 2013, jana alipoteza fahamu kwa muda baada ya kupata matokeo hayo.

Mwanafunzi huyo, Joyceline Marealle wa Shule ya Sekondari Canossa ya Dar es Salaam, alipatwa na mkasa huo muda mfupi baada ya mwandishi wa gazeti hili kumpigia simu na kumweleza matokeo hayo.

Baada ya kupigiwa simu yake ya mkononi iliyopokelewa na mama yake mzazi (Caroline Munuo), ambaye alisema mtoto wake hajapata taarifa hiyo na kumtaka mwandishi aitoe mwenyewe kwa binti huyo kisha kumpa simu hiyo Joyceline.

Baada ya binti huyo kupewa simu na kuanza mazungumzo na mwandishi alisema: “Naomba usiniambie! Ni kitu kikubwa Mungu amenifanyia.”

Joyceline aliyesikika akitamka maneno hayo huku akilia ghafla sauti yake ilikatika na kukaa kimya kwa sekunde kadhaa, kabla ya mama yake kuchukua simu hiyo, ambapo alieleza kuwa binti yake anaishiwa nguvu.

“Naomba umpigie simu baadaye ameishiwa nguvu anataka kuanguka,” alisema mama huyo wa Joyceline.

Mama yake alisema alitegemea matokeo hayo kwa sababu binti yake na mwenzake ambao ni pacha wamekuwa wakifanya vyema kwa kushika nafasi mbili za kwanza darasani.

Naye mwanafunzi aliyeshika nafasi ya kwanza kitaifa, Robina Nicholaus wa Sekondari ya Wasichana Marian ya Pwani, alisema:

“Mimi ni wa kwanza na wa mwisho kwenye familia yetu, pia nimekuwa kwa kwanza kitaifa katika mtihani wa kidato cha nne, namshukuru Mungu.”

Aliongeza: “Nilitarajia kufaulu, lakini siyo kuwa mwanafunzi wa kwanza. Mungu amenisaidia kuelekea kutimiza ndoto yangu ya kuwa daktari wa watoto.”

Mama mzazi wa Robina, Pili Mogasa alisema anamshukuru Mungu kwa kumsaidia binti yake kufaulu na kuongoza kitaifa na kwamba hayo ni majibu ya maombi yake.

Mwanafunzi aliyeshika nafasi ya nne kutoka Shule ya Sekondari ya Wasichana ya Marian, Sarafina Mariki, alisema alitarajia kufaulu huku malengo yake yakiwa kuwa miongoni mwa wanafunzi watano bora kitaifa.

“Ndoto zangu zimetimia nilitaka kuwa kati ya wanafunzi wa kwanza hadi watano bora, namshukuru Mungu nimefanikiwa,” alisema.

Baba mzazi wa Sarafina, Wilfred Mariki akizungumza kwa simu kutoka Kigoma alisema anafuraha kubwa kiasi kwamba anajisikia kushiba siku nzima.

“Furaha niliyonayo hata tusipokula chakula leo sawa,” alisema Mariki huku mama mzazi wa Sarafina, Jane Mariki akisema binti yao alikuwa na tabia ya kuamka usiku kujisomea tangu akiwa shule ya msingi.

Mwanafunzi Janeth Urassa akiyeibuka namba tisa, ambaye anaishi Tanga alisema hakutarajia kuwa miongoni mwa kundi la wanafunzi waliofanya vizuri kitaifa, lakini matokeo hayo yanamwezesha kutimiza ndoto yake ya kuwa daktari wa moyo.


0 comments: