MBINU 13 ZA KUWA JASIRI NA KUFANIKIWA KIMAISHA

0 comments
Mbinu 13 na rahisi za kupata ujasiri ujasiri kimafanikio.

1. Kutoshindana na waliofanikiwa.

Daima mtu ahakikishe anawafanya waliofanikiwa wajione wapo juu. Kama mtu anataka kuwashangaza basi asionyeshe ujuzi wake wote.
Kuwapa waliofanikiwa heshima yao kutamfanya mtu apate msaada na hatimaye afikie kiwango cha juu bila ya kupata tabu nyingi.

Mfano, mtu asishindane na mwajiri wake ili kuonekana anajua sana; asishindane na tajiri katika matumizi hususani mazingira ya kijamii kama baa, misiba n.k. Waliofanikiwa hutafsiri kitendo cha kushindana kama kuonyesha kiburi au maskini jeuri.

2. Kutoamini sana marafiki.

Mtu awe makini 'anapojamiiana' na marafiki au watu wa karibu. Watu wa karibu huwa wasaliti na huvujisha siri kwa wapinzani. Mtu aogope marafiki zaidi ya maadui, ikibidi awape nafasi wale anaohisi ni wapinzani. Ilkiwa mtu hana wapinzani, ajitahidi kuwatafuta. Mtu ajifunze jinsi ya kutumia wapinzani kimafanikio, si kuwaamini marafiki muda wote.

3. Kuficha malengo.

Mtu afiche matarajio yake au dhamira za matendo yake. Kuweka malengo hadharani huwafanya watu wenye nia mbaya kujipanga na kuvuruga malengo husika. Mtu akinge malengo yake na ikiwa yatagundulika iwe nyakati za mwisho; nyakati ambazo wapinzani hawawezi kuweka vikwazo.

4. Kutumia wasidizi.


Kufankiwa kwa mtu kunategemea mchango anaoupata kutoka kwa wale wanaomzunguka (mazingira na marafiki). Mtu atumie busara, ujuzi na maarifa ya wale anaofanya nao kazi ili kusonga mbele. Msaada haupunguzi tu nguvu, bali pia huongeza ufanisi na kuimarisha urafiki. Mtu hupata fadhila kutoka kwa wasaidizi wake, ndipo jamii husika. Hivyo, mtu awaachie watu wengine yale wanayoweza kufanya kwa ufanisi.

5. Kushinda kupitia matendo.

Ushindi mtu anaopata kupitia maneno haufai kitu! Mtu asishindane juu ya uwezo wake kwa maneno bali, aache matendo yaongee. Ushindi makini ni ule mtu anaoupata kupitia matendo yake, na si kwa wingi wa maneno. Uhalisia wa matendo huonyesha umakini wa mtu kwa jamii inayomzunguika. Mtu husifiwa kwa kadiri ya juhudi zake za hali na mali kutatua changamoto zinazomsonga, si kwa kupiga domo.

6. Kujenga utegemezi.

Ili mtu kujua umuhimu wake katika jamii anapswa kjua kwa kiasi gani mchango wake unahitajika. Mtu ajenge mazingira ya kutegemewa; kutegemewa kuleta furaha au ustawi katika mazingira yanayomzunguka.

Ili kfanya hivyo, mtu asitoe mbinu zote alizo nazo juu ya kitu fulani. Kutegemewa humwezesha mtu 'kuuza' kile alichonacho kwa mafanikio yake na ya jamii yake. Hivyo, mtu ajue wakatigani wa kuficha huduma yake, wakati gani wa ktoa kidogo na wakati gani wa kutaka watu wailipie.

7. kutenda kama mpelelezi.

Ni muhimu sana mtu kujua juu ya wapinzani wake. Mtu atumie marafiki (wapambe) ili kupata taarifa muhimu juu ya udhaifu na uwezo wa wapinzani wake. Kufanya hivyo kutamwezesha mtu kupanga mipango ya kiulinzi na ambayo haitazimika katika safari yake ya mafanikio. Kupata taarifa kunafanikishwa kwa kuuliza maswali rahisi, kuuliza kwa njia ya upole na kwa kutumia mifano. Kila wakati ni fasaha kwa upelelezi.

8. Kuwafahamu watu wa karibu.

katika mazingira yoyote yale kuna watu wa aina nyingi. Watu hutofautiana kiimani, kitabia, kimalengo, kiutendaji n.k. Watu wa karibu ndio wanaotoa au kufanikisha kotoa ushindani katika mazingira yasiyotegemewa. Watu wengi, tena wa karibu ni kama mbwa mwitu. Ili kufahamu watu wa karibu, mtu atafakari kwa kina misingi mikuu ya urafiki huku akibadilisha muonekano, kutoa changamoto kwa walengwa n.k. Pindi mtu anapofanya yote hayo atazame mwitikio ya walengwa.

9. Kuwa na dira.

Dira humwezesha mtu kufika kule anakotaka. Mtu anapaswa kuweka malengo juu ya kule anakotaka kufika baada ya muda fulani pia, changamoto azazohisi zitamkumba sambamba na suluhu sahihi. Kwa kuwa na malengo haitakuwa ngumu sana kukabiliana na vikwazo mtu awapo safarini. Watu wengi huweka malengo huku wakisahau au kupuuzia adha zinazoweza kuwakumba au zilizowakumba watu wengine waliokuwa na malengo kama yao.

10. Kujikuza.

Mtu asipokee na kukubali sifa 'chafu' anazopewa na jamii. Mtu anapaswa kujikuza kwa kuvaa utambulisho mpya; ambao unavuta umakini na hauiudhi jamii yake. Mtu anapaswa kutawala taswira yale, si taswira yake ktawaliwa na nguvu kutoka nje. Kujikiza kwa jitihada za mtu huleta taswira ya kudumu, na ambayo italeta uaminifu wa kweli na kukubalika katika jamii.

11. kuwa na shabaha.

Mtu anapaswa kuelekeza nguvu na jitihada kwa yale anayoamini yataleta matunda mazuri. Mtu awe makini kutunza au kutenga nguvu za ziada kwa ajili ya changamoto. Ili kutokata tamaa, mtu anapswa kuwa na wadu (watu wa karibu) wenye uwazo tofauti tafauti kama vile madaktari, wafanya biashara, waalimu, viongozi wa dini, wazee wenye busara n.k

12. Kujirudisha nyuma.

Kama mtu akiona changamoto zitamzidi siku a usoni, huku mbinu alizo nazo au mikakati yake itakuwa dhaifu ahairishe 'pambano'. Kurudi nyuma kutampa mtu nafasi ya kujipanga kwa kukusanya nguvu na 'kuusoma mchezo zaidi'. Mtu asikubali kuangushwa kabisa na changamoto ndipo ajiandae kuinuka. Ni vigumu sana mtu kuamka baada ya kushambuliwa na kuangamizwa na chahangamoto za kimaisha.

13. Kutojitenga.

Kujitenga na jamii au marafiki ni hatari sana! Kwani ulimwengu ni tambara bovu na uumejaa wapinzani kila kona. Inapasa mtu kujiundia ngome ya ulinzi lakini, si kwa kujitenga. Kujitenga hupunguza mawasiliano na watu na pia uwezekano wa kupata misaada ya hali na mali. Kwa mfano, kuna uwezekano mkubwa wa kukosa habari, ushauri, vitendea kazi n.k. Vitu ambavyo ni muhimu kufikia mafanikio.

Read More »

Hospitali ya Muhimbili Wachanganya Maiti..Ndugu Wasafirisha na Kuzika Maiti Isiyo yao...

0 comments
Hospitali ya Taifa Muhimbili (MNH) imeingia katika mkasa baada ya kutoa mwili wa marehemu kwa watu tofauti ambao nao bila ya kujua, waliusafirisha na kuuzika Usangi, Mwanga mkoani Kilimanjaro.

Kutokana na kosa hilo, hospitali hiyo kwa kushirikiana na Jeshi la Polisi, jana walilazimika kufukua maiti hiyo ya Janeth Bambalawe (65), kuirejesha Dar es Salaam ili ikabidhiwe kwa wahusika baada ya kusafirisha maiti ya Amina Msangi (79), ambayo iliachwa kwa makosa katika chumba cha kuhifadhia maiti hadi Usangi.

Ilivyokuwa

Sintofahamu hiyo ilitokea juzi asubuhi baada ya ndugu wa Janeth, kufika mochwari Muhimbili ili kuuchukua mwili wa marehemu huyo kwa ajili ya maziko katika makaburi ya Kipunguni, Ukonga na kuukosa.

Akizungumzia mkasao Mkurugenzi wa Huduma za Tiba Shirikishi MNH, Dk Praxeda Ogweyo alisema ndugu wa Amina ambaye alifariki Aprili 8 hawakuukagua mwili wa marehemu baada ya kupewa na badala yake waliondoka na mwili wa Janeth.

Alisema marehemu Amina aliyefikishwa hospitalini hapo kwa rufaa akitokea Temeke Aprili 6 na kulazwa wodi 12 katika jengo la Kibasila, alihifadhiwa jokofu moja na Janeth ambaye alifikishwa hapo kutokea Amana Aprili 4 na kulazwa wodi 2 jengo la Mwaisela. Naye pia alifariki Aprili 8.


“Wote walifariki siku moja, wakahifadhiwa katika jokofu moja kwa hiyo mtumishi wa mochwari alipokwenda kuutoa mwili alichanganya badala ya kuwapatia mwili wa Amina, akawapa ule wa Janet na ndugu nao hawakushiriki kikamilifu kukagua,” alisema Dk Ogweyo.

Alisema kwa kutambua kosa hilo, Muhimbili ilitoa gari la wagonjwa na wafanyakazi wawili kwa ajili ya kuupeleka mwili wa Amina, Usangi kwa ajili ya mazishi na kuurejesh Dar es Salaam ule wa Janeth. Pia iliwasiliana na jeshi la polisi kwa ajili ya taratibu za kufukua mwili huo. “Wawakilishi wetu wamekwenda Mahakama ya Mwanzo, Wilaya ya Mwanga kwa ajili ya viapo na baadaye jioni watafukua mwili tayari kwa safari ya kuurejesha kwa ndugu husika kwa mazishi,” alisema.

Alipopigiwa baadaye jioni Dk Ogweyo alisema: “Mwili unafukuliwa sasa na baada ya kukamilisha, watauandaa na wataanza safari usiku (jana) kuurudisha Dar es Salaam, tunatarajia watafika alfajiri au asubuhi (leo).”

Mbali na hatua hiyo, Dk Ogweyo alisema mtumishi aliyefanya kosa hilo amesimamishwa kazi kupisha uchunguzi.

Akielezea hali ilivyokuwa mtoto wa marehemu Janeth, Peter Mkude alisema walipofika Muhimbili aliingia na kuonyeshwa mwili wa mama yake ambao hakuutambua, akatoka na aliporudi mara ya pili aliongozana na mama zake wadogo wawili na dada yake, lakini pia hawakuutambua.

Kuona hivyo walikwenda katika ofisi za utawala ambako waliongozwa kwa mwanasheria ambaye baada ya maelezo, waliongozana naye hadi mochwari na baada ya kuthibitisha kwamba mwili umekosekana, walikwenda Kituo Kikuu cha Polisi ambako waliandikisha maelezo na kupewa ahadi ya kurejeshewa mwili wa ndugu yao.

“Walituambia kwamba wataufukua na kufikia Aprili 13 (leo) tutakuwa tumeupata, tumepanga kuzika siku hiyohiyo katika makaburi ya Kipunguni Mashariki, Ukonga saa 10 jioni,” alisema Mkude.     

Read More »

Undani Kifo cha Mwanamuziki Ndanda Kosovo Huu Hapa...

0 comments
Habari zilizolifikia Wikienda mara tu baada ya kutokea kwa msiba huo asubuhi ya Jumamosi iliyopita zilieleza kuwa, Ndanda alisumbuliwa na tumbo ambapo alilazwa kwenye Hospitali ya Mwananyama na baadaye kuhamishiwa Muhimbili jijini Dar.
Akizungumza na Wikienda, mjomba wa Ndanda ambaye pia ni mwanamuziki, Cardinal Gento alisema kuwa, Ndanda alihamishiwa Muhimbili baada ya tatizo lake kushindikana Mwananyamala.

“Nilikesha naye hospitalini, ilipofika asubuhi nikaondoka kurudi nyumbani kwa ajili ya chakula, nikaacha anafanyiwa mpango wa damu maana alikuwa amepungukiwa, lakini muda mfupi baada ya kuondoka, nikapigiwa simu amefariki dunia,” alisema Gento wakiendelea na utaratibu wa msiba nyumbani kwa Ndanda, Madale, Dar.

Kabla ya kukutwa na umauti, historia ya ugonjwa wake inaonesha ilianza mwaka jana ambapo aliripotiwa na Magazeti ya Global kuwa alilazwa kwenye Hospitali ya PKA iliyoko Tegeta, Dar akisumbuliwa na tatizo la kupasuka kwa mmoja wa mishipa tumboni hivyo kutapika damu.

HISTORIA FUPI YA NDANDA KOSOVO
Ndanda aliwika na Bendi ya FM Academia International ambapo alitunga nyimbo za FM Academia baada ya kutoka jela akiwa na akina Nyoshi El-Sadaat, Maluu Stonch, Mulemule FBI, King Blaize, Patcho Mwamba, Gento na wengine kibao waliotamba na Wimbo wa Wajelajela.

Baadaye Ndanda alitoka FM Academia International akaanzisha Bendi ya Stono Musica akiita Wajelajela Original akiwa na Maluu, Chai Jaba, Patcho na wengine. Miongoni mwa nyimbo zake zilizotamba ni pamoja na Binadamu pamoja na rap zake za Kidedea na Kaokota Big G.

Baadaye Ndanda aliachana na Stono Musica akaelekea Marekani kwa shughuli za kimuziki ambazo zilikuwa na mafaniko makubwa. Aliporejea Bongo ndipo akaanzisha Kundi la Watoto wa Tembo kabla ya kuachana na bendi na vikundi na kuwa msanii anayejitegemea.

Read More »

Naibu waziri aeleza kiama cha simu feki

0 comments

Naibu Waziri wa Ujenzi, Uchukuzi na Mawasiliano, Injinia Edwin Amandus Ngonyani (MB) amesema serikali haitaongeza hata siku moja terehe ikifika ya kuzima simu feki.
Katika mahojiano ya ana kwa ana na gazeti hili ofisini kwake hivi karibuni, Naibu Waziri Ngonyani alijibu maswali mengi, ungana nasi ili kujua mengi:
Swali: Unasimamia wizara tatu zilizounganishwa pamoja, ni changamoto gani mnazokumbana nazo?
Jibu: Hadi sasa naweza kusema hakuna changamoto yoyote iliyojitokeza katika usimamiaji wa wizara hii ambayo ni zao la wizara mbili (Wizara ya Ujenzi; na Wizara ya Uchukuzi) pamoja na Idara mbili za sekta ya mawasiliano kutoka iliyokuwa Wizara ya Mawasiliano Sayansi na Teknolojia. Wizara hii ina jumla ya taasisi zipatazo 26.
Kama wizara tumejipanga vema kuanzia ngazi ya juu hadi ya chini kuhakikisha tunatimiza lengo kuu la kuwajengea Watanzania miundombinu ya kisiasa itakayowezesha Tanzania kufikia uchumi wa kati ifikapo mwaka 2025.
Tulianza na kukutana na menejimenti ya taasisi hizo zilizopo chini ya wizara pamoja na watumishi wa wizara ili kuainisha changamoto zinazowakabili ambazo katika changamoto hizo zilionekana zinaweza kutatuliwa endapo kila mtumishi atajituma na kuwajibika katika eneo lake.  Tuliwaeleza watumishi hao kuwa kila mmoja atapewa malengo na atapimwa kulingana na malengo aliyopewa.
Mambo mengine tuliyowakumbusha ni ushirikiano baina ya watumishi wa sekta hizo ili kuiwezesha wizara kufanya kazi kama timu moja; uadilifu na uaminifu katika kazi; kuwa makini katika kuingia mikataba; na kusimamia utekelezaji wa mikataba tunayoingia kwa weledi wa hali ya juu ili Watanzania wapate thamani ya fedha yao wanayoilipia (value for money).
Swali: Hivi sasa kuna mjadala juu ya kuzima simu zote feki ifikapo Juni, mwaka huu kama wizara, mnalizungumziaje hili? Je, nani wa kulaumiwa kufuatia kuzagaa kwa simu feki nchini? Je, mtaweza kusogeza mbele tarehe ya kuzizima simu hizo?
Jibu: Vifaa vya mawasiliano vya mkononi-hususan simu za kiganjani na vifaa vya mawasiliano vya kiganjani (tablets) vina namba maalum inayovitambulisha. Namba hiyo inajulikana kama IMEI ambacho ni kifupi cha International Mobile Equipment Identity.
Kifungu cha 84 cha sheria ya Mawasiliano ya Kielektroniki na Posta (EPOCA) ya 2010 kinataka kuwepo kwa mfumo wa rajisi ya namba za utambulisho wa vifaa vya mawasiliano vya mkononi. Rajisi hii inajulikana kwa Kiingereza kama Central Equipment Identification Register, kwa kifupi CEIR. Sheria inataka rajisi hiyo ihifadhiwe na kuendeshwa na Mamlaka ya Mawasiliano Tanzania.
Aidha, kanuni za mawasiliano ya kielektroniki na posta za namba tambulishi za mwaka 2011 za EPOCA kuhusu Mfumo wa Rajisi ya Namba za Utambulisho wa Vifaa vya Mawasiliano vya Mkononi inawataka watoa huduma wa mawasiliano yanayotumia vifaa vya mkononi kuweka mfumo wa kudumu wa kumbukumbu za namba tambulishi yaani Equipment Identity Register – EIR  za vifaa vya mkononi vinavyotumika kwenye mitandao yao.
Mfumo huu wa kielektroniki ambao utahifadhi kumbukumbu za namba tambulishi za vifaa vya mawasiliano vya mkononi una lengo la kufuatilia namba tambulishi za vifaa vinavyoibiwa, kuharibika, kupotea au ambavyo havikidhi viwango vya matumizi katika soko la mawasiliano.
Vifaa vyote vya mawasiliano vya mkononi ambavyo vimeibiwa, vimeharibika, kupotea au visivyokidhi viwango vya matumizi katika soko la mawasiliano havitaweza kufanya kazi kwenye mitandao ya mawasiliano kutumia vifaa vya mkononi.
Mtu yeyote ambaye atatambua kwamba simu yake ya kiganjani si halisi baada ya kuihakiki kwa kuandika namba *#06# na kuituma kwenda 15090 na kugundua ni bandia na haikidhi viwango anapewa muda wa kuendelea kutumia simu hiyo hadi Juni 16, mwaka huu. Watumiaji wote wenye simu za kiganjani ambazo namba tambulishi zao zinaonesha kwamba simu hizo si halisi, ni feki na hazikidhi viwango watagharamia ununuzi wa simu nyingine wao wenyewe. Hatutaongeza hata siku moja kuzima siku feki.
Mheshimiwa Waziri wa Uchukuzi, Ujenzi na Mawasiliano, Profesa Makame Mbarawa alitoa maelekezo kwa Mamlaka ya Mawasiliano kupitia Kanuni za Mfumo wa Rajisi ya Namba za Utambulisho wa Simu za Kiganjani (Central Equipment
Identification Register-CEIR) kuwa mfumo huu uanze kazi haraka iwezekanavyo. Tayari Mfumo huu umeanza kazi tangu tarehe 17 Desemba 2015 baada ya kuzinduliwa na Katibu Mkuu Kiongozi.
TCRA ilitoa miezi sita hadi kufikia tarehe 16 Juni 2016 simu zote ziwe zimefungwa.  Naomba kuchukua fursa hii kusisitiza Mamlaka ya Mawasiliano ihakikishe kuwa zoezi hili la kufungia simu bandia linatekelezwa kama ilivyoagizwa na viongozi wa Kitaifa bila kuongeza muda wa kusubiri ambao hawatakuwa wamekamilisha kuhakiki na kufahamu kama simu zao ni bandia au la.
Ningependa vilevile kuwasisitizia kampuni zote za simu kutoa ushirikiano wa dhati ili kukamilisha zoezi hili. Aidha, naelekeza makampuni hayo kuwapa huduma stahiki bila usumbufu wateja wao waliopotelewa au kuibiwa simu zao na zifungwe kwa mujibu wa kanuni ili zisiweze kufanya kazi. Hali kadhalika, niwaombe jeshi la polisi kuwasaidia raia watakaofika kutoa taarifa za kuibiwa au kupotelewa simu zao, wawape ushirikiano na kuwahudumia kwa haraka ili zoezi hili lifanyike kwa mujibu wa sheria na kanuni zake.
Hakuna mtu wa kulaumiwa katika hili kwani hii ni moja ya changamoto ambayo inazikabili nchi nyingi duniani ikiwa ni pamoja na kuwepo bidhaa nyingi feki katika nchi nyingi, zikiwemo bidhaa za ujenzi, madawa nk ambavyo huingizwi nchini na wahalifu kupitia njia za panya.
Mfumo wa rajisi ya namba za utambulisho wa vifaa vya mawasiliano vya mkononi una lengo la kuwahakikishia watumiaji usalama wakati wanapotumia vifaa hivyo vya mawasiliano, vikiwemo simu za kiganjani na vifaa vya mawasiliano vya kiganjani (tablets). Uanzishwaji wake ni sehemu ya kutekeleza matakwa ya Sheria ya Mawasiliano ya Kielektroniki na Posta ya 2010. Ni vyema watumiaji wakazingatia maelekezo kuhusu utaratibu wa kuhakiki namba tambulishi, kutoa taarifa wanapopoteza au kuibiwa simu.

Read More »

Wabunge Wahoji Uhalali wa Kisheria wa Rais Magufuli kuhamisha fedha za Muungano na Kuzipeleka Kwenye Ujenzi wa Barabara Mwanza Wabunge Wahoji Uhalali wa Kisheria w

0 comments
Baadhi ya Wabunge wamehoji uhalali wa kisheria wa Rais John Magufuli kuhamisha fedha zilizotengwa kwa ajili ya sherehe ya Muungano na kuzipeleka kwenye ujenzi wa barabara katika Uwanja wa Ndege wa Mwanza.

Wabunge hao walihoji hilo wakati wa semina iliyofanyika jana katika Ofisi Ndogo za Bunge jijini Dar es Salaam , iliyoendeshwa na Dk Haji Semboja kutoka Chuo Kikuu cha Dar es Salaam na Harold Sungusia wa Kituo cha Sheria na Haki za Binadamu (LHRC).

Mbunge wa Mchinga, Hamidu Bobali alihoji juu ya mamlaka ya Rais katika kutumia fedha ambazo zilishapangiwa bajeti na Bunge na kuzipeleka kwenye maeneo mengine.

Alihoji pia juu ya nidhamu ya Serikali katika usimamizi wa Bajeti iliyopitishwa na Bunge. Mbunge huyo alisema dhana ya mgawanyo wa madaraka haipo kwa sababu Serikali ina nguvu kuliko Bunge na Mahakama hivi sasa.

Alisisitiza kuwa nguvu hiyo ndiyo inayomfanya Rais afanye kitu chochote anachotaka.

Mbunge wa Viti Maalumu, Lucia Mlowe alisema moja ya majukumu ya Bunge ni kuisimamia Serikali, lakini anashangaa kuona yenyewe ikilisimamia Bunge katika mambo mbalimbali.

Alisema hata suala la Rais kuhamisha fedha zilizokuwa zimetengwa kwa ajili ya sherehe ya Muungano, ni kuingilia madaraka ya Bunge, kwa sababu fedha hizo tayari zilikuwa zimeidhinishwa kwa ajili ya matumizi hayo.

“Naomba kupata ufafanuzi kutoka kwa wataalamu hapa, Rais ana mamlaka gani ya kuhamisha fedha zilizotengwa kwa ajili ya jambo fulani? Pia, ni namna gani wabunge tunaweza kuisimamia Serikali kama hamna uwiano kati ya mihimili hii mitatu,” alihoji mbunge huyo.

Akijibu hoja hizo, Dk Semboja alisema Sheria ya Bajeti ya 2015, inampa mamlaka Rais kupeleka fedha katika eneo analoona inafaa.

Alisema sheria hiyo inatoa sharti moja, kwamba Rais kupitia Waziri wa Fedha, atatoa taarifa bungeni juu ya matumizi ya fedha hizo.

Dk Semboja alisema mamlaka hayo yanatambuliwa pia katika Ibara ya 137 ya Katiba ya Jamhuri ya Muungano, hivyo Rais hajakosea kuhamisha fedha hizo kwenda kujenga barabara isipokuwa taarifa ya matumizi itolewe bungeni hata kama matumizi yanaonekana.


“Bunge lazima lifahamishwe kuhusu matumizi ya fedha hizo.Kama ni udhaifu wa kipengele hiki, basi unaanzia kwenye Katiba,” alisema Dk Semboja.

Pia, Sungusia alisema, “Fedha ambazo Rais hawezi kuziingilia ni zile zilizo kwenye consolidated fund (mfuko hodhi), nje ya hapo anaweza kufanya lolote,” alisema mwanasheria huyo.

Read More »

Diamond yamkuta mazito

0 comments
NA mwandishi wetu, Risasi Jumamosi
Dar es Salaam: Kitendo cha kuposti picha inayomuonesha akiwa ametoboa pua na kuvaa kipini kilichofanywa na staa wa Bongo Fleva, Nasibu Abdul ‘Diamond Platnumz’ kimemfanya yamkute mazito kufuatia mashehe kumjia juu na kuwa gumzo.
Gumzo lilianza juzikati baada ya Diamond kutupia picha kwenye akaunti yake ya Instagram, ikimuonesha akiwa amevaa kipini, kama wafanyavyo wanawake, kitendo kilichoamsha mjadala mkubwa kwa mashabiki na wadau mbalimbali wa muziki wake.
Wapo waliomuunga mkono kwa maelezo kwamba hakuna mtu anayepaswa kumuingilia kwa sababu hayo ni maisha yake binafsi, huku wengine wakienda mbele kwa kuwatolea mfano mastaa wengine wakubwa duniani kama Chris Brown, Wiz Khalifa, marehemu 2Pac na wengineo kwamba nao waliwahi au wametoboa pua.
Diamond-PlatnumzHata hivyo, kundi jingine kubwa, lilimjia juu msanii huyo na kumtaka kuacha kuiga mambo yanayofanywa na wasanii wa Ulaya na Marekani na badala yake, awe kioo cha jamii kwa kuenzi na kudumisha mila na tamaduni za Kitanzania.
Baada ya kufuatilia sakata zima, Risasi Jumamosi liliwatafuta viongozi mbalimbali wa dini ya Kiislam ambayo Diamond ni muumini wake na kuwauliza kama kitendo hicho alichokifanya msanii huyo ni sahihi ambapo walimjia juu na kumshutumu vikali.
Ismail Yahya, shehe wa msikiti mmoja maarufu Kijitonyama, alisema: “Anachokifanya huyu bwana ni upotofu na kinyume na sheria za dini ya Kiislam. Ni makosa kwa mwanaume kutoga pua, kuvaa kipini, hereni, mikufu au kujichora tatuu. Sasa huyu bwana kafanya yote kaona haitoshi, kaamua na kuvaa kipini kabisa, ni makosa makubwa na kinyume na mafundisho ya dini.”
“Astaghafirullah! Anachokifanya huyu msanii ni makosa makubwa na kinyume kabisa na dini ya Kiislam. Atakuwa anafanya makusudi huyu kwa sababu naamini alisoma madrasa na alifundishwa kijana wa Kiislamu anavyotakiwa kuwa, iweje leo ajifananishe na mwanamke? Ni makosa makubwa kwa mwanaume wa Kiislam kutoboa pua,” alisema Ally Moshi, Shehe wa Madrasatul Nuur jijini Dar es Salaam.
Hata hivyo, meneja wa msanii huyo, Salam Sharaf alibuka baadaye kwenye mitandao ya kijamii na kumtetea Diamond kuwa picha hiyo si halisi bali ilitengenezwa.

Read More »

Huyu Ndiye Rubani wa Kwanza Mwanamke Tanzania Kurusha Boeing Airbus

0 comments
KATI ya wanawake wa Kitanzania waliopeperusha bendera yetu vizuri nje ya nchi kielimu ni Kapteni Hilda Wendy Ringo ambaye sasa ni rubani.
Elimu yake ya sekondari aliipata katika Shule ya Tambaza jijini Dar es Salaam na baadaye Chuo Cha Urubani cha Progress Flight Academy cha jijini Pretoria, Afrika Kusini.
Ni mwanamke wa kujivunia katika nchi yetu kwa sababu amekuwa akirusha ndege yaani rubani. Amewahi kuhojiwa na vyombo mbalimbali vya habari nchini na kuhusu kazi yake hiyo anasema:
“Kurusha ndege ni jambo zuri linalofurahisha.”
Rubani Hilda ni mama mwenye umri wa miaka 33, anasema alianza kurusha ndege akiwa na umri wa miaka 22 lakini sasa anarusha ndege hapahapa nchini katika Kampuni ya Precision Air.
Ana uzoefu mkubwa na kazi hiyo ya urubani kwa sababu ameifanya kwa zaidi ya miaka 10 sasa na ni mwanamke wa kwanza Mtanzania kurusha ndege aina ya Boeing Airbus.
Anasema wazo la kuwa rubani lilimuingia katika akili yake akiwa bado mdogo baada ya kujiuliza maswali mengi kama vile ndege ambayo ni chuma na mabati inawezaje kupaa angani?
Anasema swali hilo lilimjia wakati anasafiri mara kwa mara na wazazi wake akitokea Kilimanjaro kuja Dar es Salaam akitumia Shirika la Ndege la Tanzania (Air Tanzania) lilipokuwa linatamba katika anga ya Tanzania enzi hizo.
Kapteni Hilda akizungumzia wanawake wenzake anasema: “Tanzania ina hazina kubwa ya wanawake si tu kupitia kwenye elimu nzuri, mtu anayoweza kuitumia kuwa ana kipaji kama yeye na kwenda sehemu mbalimbali yeye binafsi au kwa kupitia taalum yake.”
Ushauri wake kwa watu wote hasa wasichana anasema: “Fanya kazi yako sawasawa na taaluma yako itakulipa vyema.”
Anawataka wanawake kuacha tabia ya kukaa bila kufanya kazi, badala yake anasema wanatakiwa kufanya kazi kwa bidii.
Anaizungumziaje serikali ya awamu ya tano ya Rais Dk. John Pombe Magufuli hasa kuhusu Shirika la Ndege la Tanzania lililokufa kifo cha mende?
“Ushauri wangu kwa serikali ni kwamba iwaruhusu wataalam wa sekta ya anga kutoka sehemu mbalimbali duniani kuja nchini na kufanya utafiti wa awali utakaojikita kwenye kulifufua upya shirika letu la ndege la taifa.”
Anafadhaika akitulinganisha na nchi ya Rwanda ambayo imekuwa katika vita vya wenyewe kwa wenyewe kwa miaka mingi lakini sasa wametuzidi katika kuendesha shirika la ndege na sasa wanalo lao, Air Rwanda ambalo ndege zake husafiri hadi Dubai na kuunganisha hadi London Uingereza.
“Tanzania katika kipindi chote tangu tupate uhuru tumekuwa na amani lakini haiwezi kujivunia shirika lake la ndege kwa kutamba kuwa limekua,” anasema huku akiamini kuwa kuna watu waliliua shirika letu la ndege kwa manufaa yao binafsi.
Hata hivyo, hivi karibuni, Rais Dk. John Magufuli alionesha tumaini la kufufua shirika letu la ndege aliposema kwamba kutokana na ukusanyaji mzuri wa kodi za serikali, kuna uwezekano wa kununua ndege zetu hata kama itakuwa kwa awamu.

Read More »

Tunda: Kupiga picha nusu utupu ni hobi yangu

0 comments
Na Mayasa Mariwata
MUUZA nyago Bongo, Tunda Sebastian amesema miongoni vya vitu ambavyo anajiona yuko huru kuvifanya ni kupiga picha za kihasara kwani anachukulia kama hobi yake.
Tunda alifunguka hayo baada ya kuulizwa sababu za yeye kupenda kupiga picha hizo ambapo alisema, yeye haoni tatizo katika hilo kwani hata wazazi wake walikuwa wakimpigia kelele lakini sasa wametulia.
“Huwezi kumjaji mtu kwa picha, sioni tatizo kwani hata ‘home’ wanajua kuwa hiyo ni hobi yangu,” alisema Tunda huku wengi wakimponda kwa tabia hiyo chafu inayokwenda kinyume na maadili ya Kitanzania

Read More »

Kama Kweli Trilioni 1.3 Zimetafunwa NSSF, Dau ‘Asulubiwe’

0 comments

Aliyekuwa Mkurugenzi Mkuu wa NSSF, Dkt. Ramadhani Dau.
NA MWANDISHI WETU Risasi Jumamosi
“Hili jambo halikubaliki na kama tuhuma hizi ni za kweli, basi tunamuomba Rais John Magufuli amchukulie hatua za kisheria kama wanavyofanyiwa wakubwa wengine waliolitia taifa letu hasara. Hiki ni kiasi kikubwa cha fedha ambacho kingeweza kutumiwa kutatua kero mbalimbali zinazotukabili Watanzania,” alisema msomaji aliyejitambulisha kwa jina la Seve Nyari kutoka Singida.
Joji Salum, aliyepiga simu kutoka Kigamboni, Dar alisema ni kweli mradi wa ujenzi wa Jiji Jipya la Kigamboni umesimama na hawajui ni kwa sababu gani, lakini kwa ufisadi wa fedha zinazotajwa, hakuna jinsi zaidi ya kumsulubu Dau ambaye aliteuliwa na Rais Magufuli kuwa balozi lakini bado hajapangiwa kituo cha kazi kwa sababu alishiriki kwa asilimia mia moja si kwa kuzichukua bali kama mtendaji mkuu.
Kutoka Arusha, ambako NSSF inaendelea na mradi mwingine wa ujenzi wa nyumba wilayani Arumeru, Maige Joseph alisema:
Tanzania's President elect John Pombe Magufuli addresses members of the ruling Chama Cha Mapinduzi Party (CCM) at the party's sub-head office on Lumumba road in Dar es Salaam, October 30, 2015. Tanzania's ruling party candidate, John Magufuli, was declared winner on Thursday of a presidential election, after the national electoral body dismissed opposition complaints about the process and a demand for a recount. The election has been the most hotly contested race in the more than half a century of rule by the Chama Cha Mapinduzi Party, which fielded Magufuli, 56, a minister for public works. REUTERS/Sadi SaidRais wa Jamhuri ya Muungano wa Tanzania, Dkt. John Magufuli
“Wakati umefika kwa mifuko ya jamii kama huu, kudhibitiwa katika uanzishaji wa miradi yake, kwani mingi ni ya kifisadi yenye kuwanufaisha wakubwa.
“Sasa mtu una ardhi yako, lakini unanunua tena ya mtu mwingine, tena kwa bei ghali zaidi. Yaani unatoka kilometa 30 kutoka Arusha mjini, unakwenda kununua heka moja kwa shilingi bilioni moja!? Hii haijapata kutokea, labda Tanzania tu. Wasulubiwe walioshiriki,” alisema Maige.
Akaongeza: “Nasema Dau anahusika kwa sababu si ndiyo alikuwa bosi mkuu? Maana yake ni kwamba hakuna kilichokuwa kikifanyika bila ya yeye kujua. Ni lazima anajua mwanzo mwisho. Mimi naona hata huo ubalozi ungetenguliwa tu kwani ameacha doa NSSF.”
Kauli ya kutaka watu wote waliohusika kufisadi fedha hizo wasubulubiwe, pia ilitoka kwa wananchi waliopiga simu kutoka Mwanjelwa Mbeya, Tukuyu (pia Mbeya), Iringa mjini, Mtwara, Simiyu, Kondoa (Dodoma), Tanga na Mwanza.
Ufisadi ulioibuliwa hivi karibuni ni kiasi cha shilingi trilioni 1.3 kinadaiwa kutumiwa na NSSF katika mazingira yanayotia shaka katika ununuzi wa ardhi ili kutekeleza miradi miwili ya ujenzi wa nyumba huko Kigamboni na Arumeru mkoani Arusha. Jijini Dar es Salaam, mfuko huo ulianzisha mradi uitwao Dege Eco Village ambao Bodi ya NSSF iliunda Kampuni ya Hifadhi Builders inayosimamia ujenzi huo ikishirikiana na Kampuni ya Azimio Housing Estate Limited.
Mafuta_House_(cropped)
Inadaiwa Azimio Housing Estate inayomiliki ekari 20,000 huko Kigamboni, iliiuzia NSSF eneo la ekari 300 kwa shilingi milioni 800 kwa ekari moja, badala ya bei halali ya shilingi milioni 39 kwa ekari tofauti na bei iliyotangazwa na Manispaa ya Temeke mwaka 2012 wakati ikiuza eneo lake kwa shilingi elfu nane kwa mita ya mraba.
Katika ujenzi wa Arumeru, inadaiwa kampuni hiyo ya Azimio, iliiuzia NSSF ekari moja kwa shilingi bilioni 1.8, wakati bei halisi ya ukubwa huo kwa mujibu wa wakazi wa eneo hilo lililo umbali wa zaidi ya kilometa 30 kutoka jijini Arusha, ni kati ya shilingi laki tano hadi milioni moja.
Uchunguzi unaonesha Azimio iliuza eka 300 za Kigamboni kwa dola 108, 906,113 (sawa na madafu bilioni 217.8), wakati huko Arumeru mfuko huo uliuziwa ekari 655 kwa dola 556, 764, 924 (trilioni 1.13) na hivyo kuifanya jumla ya fedha ambazo ‘zimeliwa’ katika miradi hiyo miwili katika ardhi peke yake kufikia trilioni 1.3.

Read More »

KIMENUKAAAAAA! ZARI NA DIAMOND

0 comments
Mbongo Fleva, Nasibu Abdul ‘Diamond Platnumz’ akiwa Sweeden na familia yake.
DAR ES SALAAM: Hakuna furaha isiyo na karaha! Ndiyo kauli inayoweza kutumika kwenye habari ya ziara ya  Mbongo Fleva, Nasibu Abdul ‘Diamond Platnumz’ na Familia ya Wasafi Classic Baby (WCB) huko barani Ulaya ambapo staa huyo na mama mtoto wake, Zarinah Hassan ‘Zari The Boss Lady’, wanadaiwa kukinukisha, kisa kikidaiwa ni wivu wa mapenzi, Amani limenyetishwa.
NI MUDA MFUPI BAADA YA KUTUA SWEDEN
Habari kutoka kwa chanzo chetu makini ambacho ni mmoja wa watu waliopo kwenye msafara wa ziara hiyo iliyopewa jina la From Tandale to the World, zilidai kuwa, mwishoni mwa wiki iliyopita, Zari na Diamond walitibuana muda mfupi baada ya kutua katika Jiji la Stockholm nchini Sweden kwa ajili ya shoo.
Kilidai kwamba, Diamond alijikuta kwenye wakati mgumu baada ya kuvamiwa na warembo wakimtaka kimapenzi huku Zari akishuhudia.
CHANZO CHATIRIRIKA
“Huku kuna ishu ambayo ni nyeti sana maana kilichomkuta Diamond kwa Zari walipofika hotelini kama isingekuwa sisi kuokoa jahazi basi hata shoo zingeharibika maana wivu wa Zari uliharibu hali ya hewa kiasi cha kujikuta mama Diamond (Sanura Kassim a.k.a Sandra) akibaki njia panda na kujuta kusafiri.
MAMA D AFANYA KAZI YA ZIADA
“Ilibidi mama Diamond kufanya kazi ya ziada ya kusuluhisha ugomvi ambao ulitokana na vimwana wa Kibongo waishio huku (Sweden), kumvamia Simba (Diamond) wakiashiria kumtaka kimapenzi huku Zari akishuhudia laivu.
diamond765….Akiwa na mama yake.
“Unaambiwa mambo yaliharibika hatari, kila mmoja akalala kwenye chumba chake. Sema Diamond ana moyo wa kiume tu la sivyo angekuwa naye ni mtu wa kususa basi Salam (mmoja wa mameneja wa Diamond) na mama Diamond wangepata shida zaidi kwani Zari hakuna somo alilokuwa akielewa hata kidogo juu ya msala huu.
“Huwezi kuamini baada ya kumuona Diamond amegandwa na warembo, Zari akajua ni mademu zake labda alijuana nao siku nyingi.
“Ishu ilikuwa hivi; siku hiyo baada ya kufika hotelini na mashabiki wa Sweden kujua kuwa tayari timu nzima ya Wasafi ipo hapa, tulishangaa kuona watu wakija hotelini kumuulizia Diamond, jambo ambalo hata sisi lilitushangaza kwamba walijuaje kama yupo ndani ya nyumba?
“Ukiacha hilo, tulishangaa zaidi wakati tunajiandaa kwenda kuuona ukumbi wa kufanyia shoo yaani wakati wa ‘rehearsal’ kulifumka umati ukitaka kupiga picha na sisi na baadaye ndiyo watu wakatutokea hadi hotelini,” kilisema chanzo hicho na kuongeza:
“Hata hivyo, utu uzima dawa kwa sababu mama Diamond na Salam walifanikiwa kuwaweka sawa na hata ukumbini walikwenda pamoja japokuwa Zari alionekana kutii wito kwa shingo upande kama anavyosema Harmonize kwenye wimbo wake wa Aiyola.”
Diamond-Platnumz-4….Wakiwa matembezini.
HUYU HAPA DIAMOND
Baada ya kupenyezewa ‘ubuyu’ huo, Amani lilifanya juhudi za hali na mali ili kupata majibu kutoka kwa Diamond kama ni kweli ‘mtiti’ huo ulimkumba kiasi cha kumfanya atofautiane na mama Tiffah ambapo alipopatikana kwa njia ya WhatsApp alifunguka ‘eituzedi’.
Diamond alisema suala la msanii kutoka nje ya nchi na kujikuta akipapatikiwa na watu ni jambo la kawaida kwani mapenzi ya mashabiki wa ndani na nje ya nchi huwa ni tofauti hivyo kama ukiwa na mke au mpenzi wako na ukawa hujamjulisha hilo lazima mtajikuta mkizinguana.
AKIRI KUTOFAUTIANA
“Kusema kweli mimi nilipokelewa vizuri karibia kila sehemu nilipoanzia kufanya shoo zangu na hapa Sweden kweli watu wameonesha hamasa kubwa kupita kiasi, ninachoweza kusema kwa sasa ni kwamba suala la mimi na mama mtoto wangu kutofautiana si vyema kuliweka wazi ila ikumbukwe tu kuwa kutofautiana kwa  wapenzi mnapokuwa pamoja hilo lipo tu maana binadamu tumeumbwa hivyo.
Diamond-Platnumz“Ninachoweza kusema kwa sasa mimi na Zari tuko poa, mambo yanaenda vizuri na ndiyo maana utaona hata siku hiyo kabla ya kuingia ukumbini alikuwa karibu sana na mimi na ilibidi niingie naye ili kila mtu ajue kama niko na mama mtoto wangu kwani bila kufanya hivyo kuna warembo wenye asili ya Kiafrika wakikuona kama hawajui kweli inakuwa rahisi kukuibukia hata mbele ya mke wako.
“Pia ifahamike tu kuwa mimi ni msanii hivyo mashabiki wangu ni wa aina zote, huwezi kuwabagua wala kuwatofautisha hivyo namshukuru mama Tiffah amelijua hilo na sitarajii kama anaweza kukwazika tena na shabiki kunivaa au kuniambia lolote maana si kila shabiki anajua kama nimesafiri na familia,” alisema Diamond.
ZIARA INAENDELEA
Kabla ya kutua Sweden, Diamond na Wasafi walianzia Ujerumani kisha kufunika kwa shoo kali na sasa ni zamu ya Ubelgiji na nchi nyingine barani Ulaya.
Waandishi: Musa Mateja
na Sifael Paul.

Read More »